Zelenski Putin və Tramp üzərində psixoloji qalibdir – ŞƏRH
Rusiya-Ukrayna müharibəsi ilə bağlı ABŞ-Rusiya danışıqları çərçivəsində növbəti görüşün planlaşdırılmasına baxmayaraq, artıq bəllidir ki, dialoqa maraq azalıb və danışıqlar əhəmiyyətini itirir. Qeyd edək, Ər-Riyadda baş tutan görüşlər, ünumiyyətlə ABŞ-Rusiya danışıqları yalnız Rusiya-Ukrayna müharibəsi ilə bağlı deyil.
Bunu Sosdem.az-a Milli Cəbhə Partiyasının başqan müavini, siyasi şərhçi Vüqar Dadaşov deyib.
O bildirib ki, qlobal yeni dünya düzənində Rusiyaya xüsusi rolun ayrılmasında Trampın istəkləri sadəcə onun Kremli razı salmaq niyyətinə söykənmir:
“Əgər Tramp Rusiya-Ukrayna müharibəsinin dayandırılmasını Moskvanın şərtlərinə uyğun Kiyevə qəbul etdirə bilsəydi, o zaman ABŞ Kremli Çinə qarşı özünə tərəf çəkə biləcəyinə ümid edə bilərdi, bəli ancaq və ancaq ümid. Tramp və Putin arasında sövdələşmənin tam həyata keçməsinə, daha doğrusu Ukraynanın kapitulyasiyasına prezident Zelenskinin güclü və qorxmaz siyasi iradəsi mane oldu. Zelenskiyə fiziki-psixoloji, siyasi-diplomatik hücumlar, hərbi təhdidlər Tramp-Putin tandeminin istəyinə uyğun nəticələr vermədi. İndi Zelenski Tramp və Putin üzərində psixoloji qalibdir.
Baxmayaraq ki, Trampın Rusiyaya qarşı publik ritorikasında müəyyən təzyiqlər sezilməyə başlasa da, Donald Zelenskiyə görə planlarının pozulmasını qəbul edə bilmir. Putin isə əksinə, Trampdan sona qədər istifadə etmək niyyətindədir. O, Trampı tərifləyir, Qrelandiya ilə bağlı faktiki ona dəstək verir və s.
Trampın yenidən prezident seçildikdən sonra Rusiya-Ukrayna müharibəsi vasitəsi ilə Putindən yararlanmaq planı əksinə çevrilib. Putin və Tramp arasında “kim kimi ovlamaq oyunu” açıq görünür”.
“Qaldı ki, Trampın Rusiyanı Çinə qarşı çevirmək cəhdinə, əlbəttəki Donaldın belə bir niyyətinin, gedişinin iflası öncədən məlum idi. Trampın səhvi onun siyasətə, dövlətlərə sırf kommersiya, qazanc prizmasından yanaşmasıdır.
Devrilmiş dövlət başçılarının Rusiyaya sığınması, Putinin onlara təhlükəsizlik zəmanəti, ümumilikdə Rusiyanın etibarlılıq göstəricisidir. Məsələn Putin heç bir şərtlə Bəşər Əsədi Suriyanın yeni hökümətinə verən deyil. Tramp isə siyasi fəaliyyətində belə prinsipləri nəzərə almır.
Tramp və Putin üçün sərfəli nəticələrə hesablanmış razılaşmaların tam reallaşdırılması mümkün olmadı. Qara dənizdə tərəflərin gəmilərinin hərəkəti ilə bağlı, Rusiyaya qarşı müəyyən güzəştlərin müzakirəsi və sair bu kimi anlaşmaların mümkünlüyü ilkin Tramp-Putin razılaşmalarından çox uzaq mövzudur”, – ekspert deyib.