“Bu, nə insafa, nə axlaqa sığır…” – Deputat köməkçisi

Son zamanlar sosial şəbəkələrdə ağlasığmaz bir hal müşahidə olunur. Süni intellekt vasitəsilə şəhidlərimizin səsi saxtalaşdırılır, guya onların dilindən müxtəlif fikirlər səsləndirilir.

Şəhidlik müqəddəs anlayışdır. Bu Vətən uğrunda canından keçmiş insanların ruhunu sosial şəbəkə materialına çevirmək, onların müqəddəs adını “kontent” kimi istifadə etmək nə insafa, nə də əxlaqa sığır.

Sosdeme.az xəbər verir ki, bunu Milli Cəbhə Partiyasının başqan müavini, deputat Razi Nurullayevin köməkçisi Ehtiram Mehtiyev deyib.

“Bu, sadəcə etik pozuntu deyil, həm də şəhid ailələrinin acılarını dərinləşdirən, cəmiyyətimizdə müqəddəs dəyərlərə hörmətsizlik yaradan təhlükəli bir vəziyyətdir. Şəhidin dili ilə danışmaq, onun ruhunu imitasiya etmək ən böyük hörmətsizlikdir. Bizim borcumuz şəhidlərimizi danışdırmaq deyil, onların bizə miras qoyduğu arzularını yaşatmaqdır. Şəhidlərimizin adını, ruhunu, əziz xatirəsini süni texnologiyaların oyuncağına çevirmək olmaz!

Buradan həm ictimaiyyətə, həm də aidiyyəti dövlət qurumlarına səslənirəm. Bu mövzuya ciddi yanaşmaq, şəhid adının hüquqi müdafiəsini gücləndirmək lazımdır. Müqəddəs dəyərlərimizin toxunulmazlığı dövlətimizin və cəmiyyətimizin şərəf məsələsidir”, – deputat köməkçisi bildirib.