Nə qədər fitrə verilməlidir? – Dinşünas

Oruc tutan olsun yaxud tutmayan, ailədəki adam başına yarım 1500 qr maddi-sosial duruma görə arpa, buğda, qarabaşaq, xurma, kişmiş, düyü, lobya yaxud pendir kimi ərzaq məhsullarından ehtiyaclı insanlara verilir.

Bayram namazına qədər verilməsi xoşdur. Bayramdan 2-3 gün əvvəl də verilə bilər. Səfər, xəstəlik kimi üzrlü səbəbdən ləngisə bayram namazından sonra da verilə bilər.

Adam başına 3 kq verilməli olduğunu da qeyd edirlər. Bu, məzhəbçilərin mövqeyidir. Özlərinə məxsus dəlillərə əsaslandığı üçün o miqdarla da vermək caizdir.

Bunları Sosdem.az-a deyən Milli Cəbhə Partiyasının başqan müavini, ilahiyyatçı Tural İrfan əlavə edib ki, imkanlı şəxslər isə daha artıq verə bilərlər:

“Çünki artıq vermək müstəhəb hökmündədir və savabdır. Fitrə üçün standart, yəni maddi durumu nəzərə alınmadan hamı üçün eyni məbləğ açıqlamaq İslama uyğun deyil. Çünki elə ailə var ki, onun imkanı arpa dəyərində fitrə verməyə çatır. Elə adam da var ki, xurma ilə verməyə imkanı çatır. Odur ki, maddi durum nəzərə alınmadan ümumi vahid miqdar və məbləğ elan etmək şəriətə müxalifdir.

Peyğəmbər ona görə fitrə veriləcək məhsulları ucuzdan bahalıya doğru sadalayıb ki, hamı öz imkanına görə fitrə verə bilsin.

İmam Əli Əbu Talib oğlu (ona və əhlinə salam olsun) Muhəmməd Peyğəmbərdən (ona və əhlinə salam olsun) belə nəql edir: “Fitr sıdəqəsini hər müsəlmanın özü, ailəsindən böyük, kiçik, kişi, qadın, azad ya qeyri-azad hər kəs üçün buğda, xurma və ya arpadan 1500 qr verməsi gərəkdir.”

“Müsnəd” – 218-ci hədis;

Həmçinin Abdullah Ömər oğlu Peyğəmbərdən nəql edir ki, o Həzrət Ramazan fitrəsini insanlara bir ölçülük quru xurma yaxud bir ölçülük arpa olaraq bütün azad və azad olmayan, kişi yaxud qadın müsəlmana fərz qıldı…

“Muvatta” – 639-cu hədis;

Eyni mənbədə, növbəti hədisdə Əbu Səid Xudri demişdir: “Biz fitrəni buğdadan bir ölçülük, arpadan bir ölçülük, quru üzümdən bir ölçülük, süzmə pendirdən bir ölçülük çıxarırdıq. Bunu Peyğəmbərin ölçüsü ilə edirdik.”

Növbəti hədisə görə Abdullah Ömər oğlu bir il fitrəni xurmadan, sonrakı dəfə isə arpadan verib.
(Bu, maddi durumla əlaqəlidir.)”, – dinşünas bildirib.