Kitabxanaların hörmətdən salınması mədəni tənəzzüldür… – Dinşünas
“Müasir texnologiyalar və internet resursları nə qədər inkişaf etsə də, kağız kitabın ecazkar ruhunu və kitabxanaların cəmiyyətdəki rolunu əvəz edə bilməz; kitabxanaların fəaliyyətinin məhdudlaşdırılması, hörmətdən salınması və insanların kitabdan soyudulması bütöv bir cəmiyyətin mədəni tənəzzülünə gətirib çıxarır”.
Bu barədə bölgələrdə kitabxanaların qapadılması və ya fəaliyyətinin zəiflədilməsi meyllərini kəskin tənqid edərək, kitabın mənəvi, psixoloji və etik əhəmiyyətinə dair Sosdem.az-a açıqlama verərkən Milli Cəbhə Partiyasının (MCP) başqan müavini, dinşünas Tural İrfan bildirib.
“Kitabxanalar Məscidlər Qədər Müqəddəsdir”
İllahiyyatçı kitabxanaların sadəcə inzibati binalar deyil, xalqın mənəviyyat məbədi olduğunu xüsusi vurğulayıb:
“Kitabxanalar cəmiyyət üçün ən müqəddəs məkanlardan biridir və onların əhəmiyyətini heç bir müasir texnoloji resurs əvəz edə bilməz. Kitabxana yalnız kitabların toplandığı yer deyil, həm də mənəvi dəyərlərin, bilik və mədəniyyətin qorunduğu bir məbəddir. Kitabxanalar məscidlər qədər müqəddəsdir. Kitab ətri, kitabxana qoxusu, onun yaratdığı nostalji hisslər insanın mənəvi, psixoloji tərbiyəsinə, əxlaqına, etik və estetik dünyagörüşünə birbaşa təsir göstərir. Müasir texnologiyalar inkişaf etsə də, kitabın və kitabxananın yerini tam şəkildə verə bilmir”.
“Rayon və Kəndlərdə Kitabxanaları Bağlamaq Yox, Təmir Etmək Lazımdır”
MCP rəsmisi kitabların yerləşdikləri coğrafiyanın tarixi yaddaşı olduğunu qeyd edərək, regional mədəniyyət ocaqlarının acınacaqlı vəziyyətinə diqqət çəkib:
“Kitablar və kitabxanalar həm də yerləşdikləri məkanların tarixi yaddaşı, mədəni irsi və kimliyinin ayrılmaz hissəsidir. Xüsusilə rayon və kəndlərdə kitabxanaların bağlanması deyil, əksinə onların təmir olunması və yeni nəşrlərlə zənginləşdirilməsi vacibdir. Kitabın özünəməxsus ruhu və cazibəsi var. Kitaba xor baxmaq keçmişə, tarixə və mədəniyyətə xor baxmaq deməkdir. Kağız kitabın öz ecazı, təravəti və oxucu ilə yaratdığı xüsusi bağ mövcuddur”.
“İnsanları Kitabdan Uzaqlaşdıran Əsas Səbəb Sosial Problemlərdir”
Gənclərin internetə yönəlməsinə və cəmiyyətdəki mütaliə faizinə toxunan ekspert, kitabdan uzaqlaşmağın əsl pərdəarxası səbəblərini açıqlayıb:
“Gənclərin daha çox internet resurslarına üstünlük verməsinə baxmayaraq, kitab oxuyanların sayı az deyil. İnsanları kitabdan uzaqlaşdıran əsas səbəblər sosial problemlər və gündəlik qayğılardır. Bununla belə, ziyalı və savadlı təbəqə hələ də kitaba bağlılığını qoruyub saxlayır. Kitabxanaların nüfuzdan salınması və insanların kitabdan uzaqlaşdırılması cəmiyyətin mədəni dəyərlərinin zəifləməsinə gətirib çıxara bilər. Kitabxanaların hörmətdən salınması, insanları kitabdan soyutmaq mədəni dəyərlərin tənəzzülüdür”.