Azərbaycanın dini tolerantlıq modeli… – DİNŞÜNAS
Bu gün dünyada dini və milli ayrı-seçkilik, separatçılıq meylləri atmaqdadır. Hətta Avropanın özündə belə islamafobiya, quranyandırma ənənələri hökm sürür. Azərbaycanda isə tarixən tolerantlıq mühiti hökm sürüb. Heç bir xarici təsir, heç bir yad elementlər bu mühiti poza bilməyib.
Bunu Sosdem.az-a Milli Cəbhə Partiyasının başqan müavini, dinşünas Tural İrfan deyib.
Ekspert qeyd edib ki, Azərbaycanın tolerantlıq mühitini pozmağa cəhdlər olub, bu gün də var:
“Lakin dövlətin apardığı səmərəli dövlət-din siyasəti, inkişaf edən münasibətlər hər zaman dinlər və məzhəblər arasında harmoniya yaradıb. İnsanlar qaynayıb-qarışıb, qohumluq əlaqələri, sosial münasibətlər inkişaf edib. Nəinki sünni-şiə arasında hətta dinlər və dinlərin mənsubları arasında sarsılmaz bağlar var. Biz kilsəyə gedib xristianlarla görüşürük, həmçinin onlar bizim tədbirlərə qatılır, yəhudilərlə də çox səmimi münasibətlər mövcuddur. Həmçinin başqa dinlərin və konfessiyaların mənsubları ilə gözəl münasibətlər inkişaf etməkdədir. Xalqımızın dərin, əsaslı etnik xarakteri, mənəvi kökləri, tarixi, milli dəyərlərimizin sağlam şəkildə günümüzə gəlib çatması buna daha da təkan verir. Cənab Prezident tamamilə yerində vurğulayıb ki, ölkəmizdə sünni və şiələr eyni məsciddə, eyni sırada namaz qılırlar. Bu, bütün dünyaya örnəkdir. Çünki bir çox ölkələrdə məzhəblər, dinlər arasında uçurumlar var”.
MCP rəsmisi vurğulayıb ki, Azərbaycanın dini tolerantlığı, multikultural dəyərləri yaşatması əksər ölkələrə örnək göstərilir:
“Vəhdət, həmrəylik, milli və dini yöndə qarşılıqlı münasibətlərin ən yüksək dərəcədə yaşadılması əslində unikal nümunədir. Dini tolerantlıq milli həmrəyliyə də töhfə verir. Cənab Prezident İlham Əliyevin təşəbbüsü ilə məscidlərin təmir-bərpa olunması, ələlxüsus Qarabağda işğaldan azad edilən qədim dini abidələrin yenidən bərpası dövlətin dinə və dini dəyərlərə ayırdığı qayğının nümunəsidir. Bu günkü tolerantlığın, multikultural dəyərlərin inkişaf etməsinin, məzhəbçilik qarşıdurmasının olmamasının, eyni məsciddə sünni və şiələrin eyni imama tabe olaraq namaz qılmalarının dünya üçün bir Azərbaycan nümunəsi olması şüksizdir. Bu sağlam mühitin bərqərar olmasında dövlətin, xüsusilə cənab Prezident İlham Əliyevin apardığı siyasətin əvəzsiz rolu var. Belə bir mühiti kənar yad təsirlərin, xarici təxribatçıların cəhdlərini puça çıxararaq yaratmaq, yaşatmaq, inkişaf etdirmək çox çətindir. Lakin dövlətin din-dövlət münasibətlərini sağlam şəkildə qoruması və bunu təmin etməsi həmin çətinlikləri, təhlükələri dəf edir və hazırda ölkəmiz müsəlman vəhdətinin beşiyinə çevrilir. Tolerantlığın Azərbaycan nümunəsi dinlərin, xalqların həmrəyliyi və inkişafı üçün böyük bir unikal dəyərdir”.