Azərbaycan futbolu “koma”dadır, çıxış yolu isə… – Hüquqşünas
Rövnəq Abdullayevin AFFA rəhbərliyindən getməsi və Rövşən Nəcəfin AFFA prezidenti seçilməsi ilə Azərbaycan futbolunun biabırçı vəziyyətdən qurtulacağına inamımız yaranmışdı. Rövşən Nəcəfin təyinatından sonra, şəxsimdə çox ümidli idim. Lakin…
Futbolumuzun utancverici vəziyyəti barədə mən də daxil olmaqla çox yazmışıq, çox demişik, ancaq dəyişən heç nə yoxdur. Daha doğrusu dəyişiliklər var, ancaq pisə və pisin dərinləşməsinə doğru.
Bunu Sosdem.az-a Milli Cəbhə Partiyasının başqan müavini, hüquqşünas Vüqar Dadaşov deyib.
“Azərbaycanda artıq aksioma formasını almış bir deyim var ki, qurumlara yeni gələn rəhbərlər öz bacarıqsızlığı ilə özündən əvvəlkilərə rəhmət oxutdurur. Yazıq Rövnəq, yazıq De-Byazi, allah sizin ölənlərimizə rəhmət eləsin.
AFFA icrayə komitəsinin son iclası federasiyanın binasında deyil, SOCAR-ın inzibati binasında keçirilib. Bu faktın özü Rövşən Nəcəfin futbolumuza nə qədər qeyri-ciddi yanaşmasının göstəricisidir”, – hüquqşünas bildirib.
Başqan müavini Azərbaycan futbolunun “koma”da olduğunu deyib:
“Əlbəttə ki, biz futbol ekspertləri deyilik, amma izn verin futbolumuzu özümüz düzəldək. Necə ki, Qarabağımızı heç kim yox, özümüz azad etdik. Nə çətin məsələdir ki, futbolumuza əsl mütəxəssislər cəlb etmək? Təkcə icrayə komitəsinin tərkibi onu göstərir ki, bəli bu şəxslərin futbola bağlılığı var, amma futbolun bu şəxslərə aidiyyəti yoxdur.
AFFA rəhbərliyi, İcrayə Kömitəsi tam tərkibdə istefaya getməlidir, təəssüf ki, bizdə istefa mədəniyyəti də heç yoxdur.
AFFA rəhbərliyinə ancaq futboldan çıxan, İcrayə Komitəsinə əsl futbol mütəxəssisləri, adları qalmaqallı olmayan və sözünü çəkinmədən deyə bilən nüfuzlu şəxslər cəlb edilməlidir. Əlbəttə ki, vəziyəti kökündən heç beş ilə də dəyişmək mümkün deyil”.
Ekspert çıxış yolunun uşaq futbolunun inkişafında olduğunu qeyd edib.
“İlk növbədə uşaqlar üçün ödənişsiz futbol məktəbləri yaradılmalı, stadionlardan istifadə əlçatan olmalı, istedadlı uşaqların axtarılması, futbola cəlb edilməsi sistemləşdirilməlidir. Futbolda tanışlıq, yuxarıdan tapşırıqlar yığışdırılmalıdır.
Martin 1-də Azərbaycan Respublikasının Prezidenti İlham ƏIiyev “Barselona” Futbol Klubunun prezidenti Xuan Laportanı qəbul etmişdi. Görüşdən sonra Azərbaycanda “Barselona” futbol akademiyasının yaradılması ilə bağlı sənəd imzalanlb. Sözsüz ki, bu hadisə Azərbaycan Futbolunda katalizator rolunu oynaya bilər. Təbii ki, bu işə də futbola aid olmayanlar qarışmasa” – V.Dadaşov deyib.