Putin Ukraynda heç bir hədəfinə çata biləmyib – ŞƏRH

Rusiya-Ukrayna müharibəsinin müvəqqəti də olsa dayandırılması ilə bağlı Trampın təkliflərini Putinin müxtəlif şərtlər irəli sürməklə faktiki rədd etməsi səbəbindən Donald Moskvaya qarşı ritorikasına hədələyici xarakter verib. Heç şübhəsizdir ki, Tramp Putin üçün, Putin də Tramp üçün çətin fiqurdur. Hər ikisi qeyri-adekvat, oturuşmuş beynəlxalq siyasi-diplomatik xətdən kənar gedişləri ilə qeyri-müəyyən siyasi liderdilər. Məhz bu səbəbdən də Putin ABŞ-dəki prezident seçkilərində Kamilla Harrisin namizədliyinə qədər Co Baydeni dəstəkləyirdi, Trampı yox.

Bunları Sosdem.az-a Milli Cəbhə Partiyasının başqan müavini, siyasi şərhçi Vüqar Dadaşov deyib.

Onun sözlərinə görə ABŞ bütün imkanları ilə Ukrayna və Rusiyaya təzyiq edir ki, müharibə dayansın.

“Bəs, ABŞ atəşkəsə niyə bu qədər maraqlıdır? Əlbəttə ki, Trampın istəyi heç də nə seçkiqabağı verdiyi sözə, nə də humanitar məqsədlərə söykənmir. Donald Ukraynanı minerallarla bağlı müqaviləyə məcbur etməyə çalışır. Rusiya isə, onun üçün sərfəli atəşkəsi belə özündə ehtiva edən müqavilənin ABŞ-Ukrayna arasında imzalanmasını istəmir.

Rusiya ehtiyat edir ki, mineral ehtiyatlarla bağlı ABŞ-Ukrayna arasında müqavilə bağlanarsa Vaşenqton bütün Ukraynanı öz faktiki müstəmləkəsinə çevirməklə, həm də gələcəkdə Ukrayna ərazisində hərbi bazalarını yerləşdirə, yeni hərbi infrastruktur yarada bilər. Bu, qeyri-rəsmi olsa da, faktiki olaraq Ukraynanın NATO üzvlüyü və NATO-nun Rusiya sərhədlərinə yaxınlaşması, genişlənməsidir”, – ekspert bildirib.

Politoloq Putinin heç bir hədəfinə çatmadığını deyib.

“Deməli, Rusiya bu savaşda qarşısına qoyduğu heç bir hədəfinə – Ukraynanın NATO-ya üzvlüyünün, NATO-nun Şərqə, Rusiya sərhədlərinə doğru genişlənməsinin qarşısını almaq – çata bilməyib. Putinin 2022-ci il 24 fevralda Kiyevə hücumun məqsədi məhz Zelenski hakimiyyətini devirmək və loyal birini Ukraynada hakimiyətə gətirmək idi. Planda Rusiya üçün ən ideal nəticə Ukraynada hakimiyyət dəyişiliyi dururdu.

Ancaq, Trampın həm Ukraynaya və həm də Rusiyaya təklif etdiyi mineral ehtiyatlarla və atəşkəslə bağlı müqavilə, razılaşma ABŞ-nin de fakto Rusiya üzərində qələbənin rəsmiləşməsidir. Ukraynanın özü isə ABŞ-nin bu qələbədən, müharibədən qazancıdır. Donaldın ikinci prezident səlahiyyətlərinə başladığı ilk günlərdən qeyd etmişdim ki, Tramp ABŞ dövlətinin siyasətini, mahiyyət etibarı ilə Co Bayden siyasətini davam etdirmək məcburiyyətindədir. Co Baydenin Ukrayna vasitəsi ilə Rusiya qarşı apardığı müharibənin qazancını Donald Tramp ABŞ üçün rəsmiləşdirməsini həyata keçirir”, – şərhçi qeyd edib.