Polis barəsində tədbir görülməsəydi, ona haqq qazandırılsaydı… – Deputat

Milli Cəbhə Partiyasının (MCP) sədri, deputat Razi Nurullayev Qəbələ rayonunun Vəndam qəsəbəsində baş verən insidentdə azyaşlının polis əməkdaşına daş atması, polisin onu döyməsi ətrafında aparılan müzakirələrə münasibət bildirib.

Deputat Pravda.az-a açıqlamasında deyib ki, polis səhv edib, lakin o da insandır, Azərbaycan vətəndaşıdır, bu cəmiyyətin bir üzvüdür:

“Təbii ki, hər kəsin səhvi ola bilər. Doğrudur, polis azyaşlıya əl qaldırmalı, döyməli deyildi. Artıq cəzasını aldı, cənab nazir göstəriş verdi, daxili işlər orqanlarından xaric olundu. Daha bundan böyük nə cəza var? Bundan başqa nə edilə bilərdi? Günah var, tədbir də görülüb. Axı bundan sonra məsələni şişirtməyin, müzakirəyə çevirməyin heç bir mənası yoxdur. Polis barəsində tədbir görülməsəydi, haqq qazandırılsaydı, təbii ki, o zaman müzakirəyə biz də qoşulardıq, tələblər irəli sürərdik. Daxili İşlər Nazirliyi doğru-dürüst hərəkət etdi, hətta polisi vəzifəsindən xaric etdi. Bu, məsələnin kökündən həll olunduğunun sübutudur. Daxili işlər orqanları işçilərinin üzərinə gedilməsini, onların cəmiyyətdə pis yöndən qələmə verilməsini qəbul etmirəm. Çünki polis bu cəmiyyətin qoruyucusudur. Polissiz təhlükəsiz yaşamaq, hətta axşamlar küçədə rahat gəzmək mümkün olmaz.

Məgər polisi bu gün tənqid edənlərin öz həyatlarında, işlərində hansısa problem yaşanmır, yaxud özləri hər hansı səhvə yol vermirlər? Polis işçilərinin dəqiq sayını bilmirəm, on mindən də böyük ordudur. Təbii ki, böyük bir ordunun içində qanunu pozanlar olacaq və cəzalandırılacaq. Polisi ümumilikdə hədəfə almağa qarşıyam. Hesab edirəm ki, cəmiyyətimiz polisə qarşı daha dözümlü yanaşmalıdır. Bu həm cəmiyyətimizin silahıdır, həm də stabilliyimiz üçün vacibdir”.